पाँचथर, पाँचथरको हिलिहाङ गाउँपालिका वडा नं ३ र ५ को सिमाना जौवारीमा आज ट्याक्सी दुर्घटना हुंदा चालक सहित ट्याक्सीमा सवार नौ जना यात्रु घाइते भएका छन्।
झापा विर्तामोडबाट ताप्लेजुङ जाँदै गरेको मे १ ज २४४२ नंको ट्याक्सी अनियन्त्रित भई सडकबाट ३ मिटर तल झर्दा सो दुर्घटना भएको पाँचथर प्रहरीले जनाएको छ।
पाँचथर प्रहरीको अनुसार ५ जना गम्भीर घाइतेहरुमा ताप्लेजुङ फुङलिङ-१ का २३ वर्षिया संगिता साप्कोटा र १७ वर्षिय अर्जुन साप्कोटा, फुङलिङ-२ कै ७२ वर्षिय सुरजकुमारी लिम्बू, फुङलिङ-२ कै ३० वर्षिया कला लिम्बू र पाँचथर कुम्मायक-३ का ३३ वर्षिय चालक खगेन्द्र गदाल छन् ।
सामान्य घाइतेहरुमा फुङलिङ-२ का ३१ वर्षिय कमल लिम्बू , फुङलिङ-२ कै १२ वर्षिया कृष्टिना लिम्बू र सोही ठाउँको ११ वर्षिया कृष्टिन लिम्बू छन्।
बाक्लो हुस्सुको कारण दुर्घटना भएको र घाइतेहरुको पाँचथरको स्वास्थ्य केन्द्र गोपेटार, जिल्ला अस्पताल फिदिम र समर्पित अस्पतालमा उपचार भइरहेको जनाइएको छ।
प्रतिक्रिया