झापा, रेमिटल्यान्ड उपन्यास लेखेर चर्चामा आएका तेह्रथुमे उपन्यासकार श्याम सिंघकलाई यस वर्षको मनमाया बान्तवा पुरस्कारबाट पुरस्कृत गरिएको छ । आज झापाको शिवसताक्षी-१ धरमपुरस्थित नवनासो पुस्तकालयको सभाहलमा रु १५ हजार रुपैयाको सो पुरस्कारबाट उहाँलाई पुरस्कृत गरिएको हो ।
मनमाया बान्तवा प्रतिष्ठानको अध्यक्ष निहाङ किराती तथा कवि मनु मन्जिलले संयुक्त रुपमा खादा ओढाएर उपन्यासकार सिंघकलाई पुरस्कार राशी सहित सम्मान पत्र प्रदान गर्नु भयो । यसअघि प्राज्ञद्वय मुनाराज शेर्मा र सुमित्रा चेलीले कार्यक्रमबारे चर्चा गर्नुभएको थियो ।
पुरस्कार ग्रहणपछि उपन्यासकार सिंघकले आफूले पहिलो पटक पुरस्कारबाट सम्मानित बन्दा आफ्नो साहित्यिक कामको उचित मूल्याङकन भएको बताउदै आफूमा थप जिम्मेवारी आएको चर्चा गर्नु भयो । सिंघकको नयाँ कृति कोइलाखाद हाल चर्चामा छ।
सम्बत् २०७५ सालमा स्थापित सो प्रतिष्ठानले विगत ७ वर्षदेखि साहित्यकार तथा कलाकारहरुलाई पुरस्कृत गर्दै आएकोमा यसअघि कविता राई, प्रकाश थाम्सुहाङ, विमला तुम्खेवालगायतका कविहरुलाई पुरस्कृत गरिसकेको जनाएको छ ।
प्रतिक्रिया