झापाा, झापा स्थित पूर्वपश्चिम लोकमार्गको दुधेको मिलनचोक सडकखण्डमा आज विहान रात्रीबस दुर्घटना भएको छ ।
काठमाडौबाट काकडभिट्टा जांदै गरेको प्रदेश-१-०१-००१ख ४२३५ नं सयपत्री यातायातको यात्रुबाहक बस दुधे माइधार सडक खण्डको मिलन चोकमा बिहान ४:४० मा दुर्घटना भएको हो ।
इलाका प्रहरी कार्यालय झिलझिलेको अनुसार २३ जना यात्रु बसमा रहेको जानकारी प्राप्त भएको छ । ती यात्रुहरुमा काठमाडौंको शिक्षक आन्दोलनबाट फर्कदै गरेका मेचीनगरका १३ जना शिक्षक रहेको बताइएको छ ।
शिक्षकहरुसहित सबै यात्रु खतरामुक्त रहेको र केही यात्रुहरुलाई चोटपटक लागेकोले उनीहरुलाई हाल बिर्तामोडको बीएण्डसी र बिर्ता सिटी हस्पिटलमा उपचारार्थ पठाइएको जनाइएको छ ।
घाइते शिक्षकहरुमा बिर्ता सिटीमा उपचारमा रहनुहुने लिलाप्रसाद भण्डारी, सिताराम रिमाल, पदम पौडेल, कमला मगर, शान्ति राई, मीन बहादुर पौडेल,सन्तोष आचार्य र सिजिना प्रसाई हुनुहुन्छ ।
उता बी एण्ड सीमा उपचारमा रहनुहुने शिक्षकहरुमा टेकचन्द्र फुँयाल, गोपाल खतिवडा, टेकेन्द्र ढकाल, लोकनाथ ठकाल ,पूर्ण बहादुर योगी, अनिल बिक, शान्ति प्रसाद उप्रेती र सिताराम अधिकारी भएको बताइएको छ ।
बिहान झिसमिसेमा नै दुर्घटना भएकोले समयमै घटनास्थल पुगि घाइतेको उद्धार गरी अस्पताल पठाउन इप्रका झिलझिलेको सुरक्षाकर्मीको टोली सफल भएको जनाइएको छ।
प्रतिक्रिया