ताप्लेजुङ, ताप्लेजुङको फक्ताङलुङ गाउँपालिका वडा नं २ खेजेनिममा गतराती गएको पहिरोमा परेर जुम्ल्याहा बालिका सहित एकै परिवारको चारजनाको मृत्यु भएको छ । दुई जना घाइते भएका छन् ।
साविक खेजेनिम-६, खेजेनिम माविको छेवैमा गएको पहिरोमा परेर फक्ताङलुङ गााउपालिका उपाध्यक्ष रविन(बिकास) साम्बाको ७० वर्षिय पिता रामबहादुर साम्बा, ५० वर्षिय आमा रनमाया साम्बा र नौ वर्षिय जुम्ल्याहा बहिनी गंगा र जमुना रहेको वडाध्यक्ष भूपेन्द्र चौलागाईंले बताए । उनिहरुको शव घरदेखि पचास मिटर तल फेला परेको र पचास वटा बाख्रा र तिसवटा कुखुरा सहितको पशुचौपाया पनि पुरिएको बताइएको छ । यसरी नै पहिरोमा परेर ४० वर्षिय युगेन लिम्बू र उनको ३ वर्षिय छोरी घाइते छन् ।
दुवै परिवारको घर पुरिएको र पूर्णरूपले क्षति भएको बताइएको छ ।
बुधबारदेखि परेको अविरल वर्षाबाट आएको बाढीले फक्ताङलुङमा छ वटा पुल बगाएपछि यातायात अवरुद्घ बनेको प्रहरीले जनाएको छ ।
प्रतिक्रिया